Қанша уақыт өтсе де, елге сіңірген еңбегі көмескі тартпайтын, халыққа құрметі арта беретін дара тұлғалар болады. Қоғам қайраткері, Жамбыл облысының Құрметті азаматы Әлмұхан Исақты осындай даралардың тізіміне қоссақ артық емес. Ш.Уәлиханов атындағы облыстық әмбебап-ғылыми кітапханасында өткен «Боямасыз болмыс» тақырыбындағы еске алу кешінде Әлмұхан Әбдірахманұлының замандастары, қызметтестері мен рухани інілері, шәкірттері бас қосты.
Іс-шараны облыстық ардагерлер кеңесінің төрағасы Еркінбек Солтыбаев ашып, қайраткердің биік болмысына терең тоқталды. Ол қайраткермен кездескен сәттерінен әсерлі естеліктер өрбітті.
«Әлмұхан Әбдірахманұлы барша ғұмырын идеология, халық басқару, қоғамдық жұмыстарға арнады. Соның арасында жеке шығармашылығына да уақыт тауып, повестер мен әңгімелер жазды. Ол қиялдан қосып емес, өмірден алып жаза білді. Мәселен, Алпысбай Шырышбаев деген майдангердің өмірі туралы, бейбіт күнде тер төккен, Еңбек Ері Әзімбек Смайлов туралы деректі жақсы әңгімелер жазып шықты», – деді Е.Солтыбаев.
Қоғам белсендісі, Парламент Мәжілісінің бұрынғы депутаты Әмзебек Жолшыбеков өз сөзінде Әлмұхан Исақты 1975 жылдан бері білетінін, партия, кеңес жұмыстарында бірге қызметтес болғанын баяндап өтті. «Жауапкершілікті жоғары сезінетін, ерекше тындырымды бір азамат болса, ол – Әлмұхан еді. Бірнеше тілге жүйрік, өте сауатты. Ол мол жұмыстарды атқарып, артына ерген іні-қарындастарына мемлекеттік, партия, әкімшілік жұмыстарының қыр-сырын үйрете білді», – деді ол.
Ал, қоғам белсендісі Қасымхан Төлендиев өз сөзінде Кенен Әзірбаевтың 100 жылдық тойын еске алып, сол тойға Әлмұхан Әбдірахманұлының қандай қомақты еңбек сіңіргеніне тоқталды. Қазақстан Жазушылар одағының мүшесі, ақын Бақытжан Советұлы нар тұлғаның облыстық телеарнаны басқарған кезеңіне, оның журналистерді сын сағатта қорғап қала алатын өткір де әділетті басшы болғанын жеткізді.
«Біз қай кезде де Әлмұхан Иса қағаның жылы жүрегін, жанашырлығын сезіндік. Ол кісі білікті басшы бола білді. Қашанда қорғап, қанаттандырудан жалыққан емес. Менің әкемді де жақсы танығандықтан, маған деген жақсы көзқарасынан айныған емес», – деді Б.Советұлы.
Мұнан соң, қоғам белсенділері Нілзия Рақышева, Қайрат Шотбақов, Үртай Сапақова өз ойларын ортаға салып, Әлмұхан Исақ жайлы жылы естеліктерімен бөлісті. Үртай Сапақова Тараз қаласынан Әлмұхан Исаққа көше атауы берілсе деген ұсынысын жеткізді.
Жиынды Еркінбек Солтыбаев қорытындылап, барлық қонақтарға және еске алу кешін ұйымдастырған кітапхана ұжымына зор алғысын білдірді.
Есет ДОСАЛЫ
«AQ - JOL». - 2025. – 29 наурыз (№34). - 8б.