24 қараша күні Жуалы аудандық орталықтандырылған кітапханалар жүйесіне қарасты Сұрым Үлгілі (Модельді) ауылдық кітапханасы мен аудандық орталықтандырылған кітапханалар жүйесінің веб-сайтының тұсаукесер рәсімі өтті.
Мақсаты: Елбасы Н.Назарбаевтың «Болашаққа бағдар: рухани жаңғыру» бағдарламалық мақаласында көрсетілген міндеттерді жүзеге асыру және «Рухани жаңғыру» бағдарламасы аясында ауыл кітапханаларын жаңғырту, оларды көпфункционалды коворкинг орталықтарына айналдыру, заман талабына сай жаңаша жабдықталып, материалдық-техникалық базасы нығайтылған, ақпараттық технологиялар көмегімен жергілікті тұрғындарға жаңа үлгідегі түрлі ақпараттық қызмет түрлерін ұсынуға бағытталған кітапханамен таныстыру.
Жиналған қауымды олардың бос уақыттарын тиімді пайдалану және осындай рухани, мәдени демалыс нысанының ашылумен Қазақстан Республикасының мәдениет қайраткері, жазушы, журналист, ақын, композитор Мырзахан Ахмет, Ш.Уәлиханов атындағы облыстық әмбебап ғылыми кітапханасының директоры Эльмира Абдинова, Жуалы ауданы әкімдігінің мәдениет және тілдерді дамыту бөлімінің басшысы Мұса Шонбаев, ауыл ақсақалы, ардагер ұстаз Сайлаубек Оразбаев құттықтады.
«Кітапханаға кітап сыйла» атты акциясы аясында жазушы, ақын Мырзахан Ахмет кітапханаға өзінің кітаптарын сыйға тартып, Ш.Уәлиханов атындағы облыстық әмбебап ғылыми кітапханасының директоры Эльмира Абдиновамен бірге салтанатты түрде жібек лентаны қию рәсімін өткізді.
