Меркі аудандық орталықтандырылған кітапханалар жүйесінің кітапханадағы күні
Ш.Уәлиханов атындағы Жамбыл облыстық әмбебап ғылыми кітапханасында Қазақстан Республикасының Президенті Н.Назарбаевтың «Болашаққа бағдар: рухани жаңғыру» бағдарламалық мақаласын жүзеге асыру және кітапханашылар арасында тәжірибе алмасу мақсатында үстіміздегі жылдың наурыз-маусым айларына жоспарланған «Рухани жаңғыру: жаңа әлеуметтік-мәдени жағдайда оқырмандарға қызмет көрсету» атты аудандық орталықтандырылған кітапханалар жүйелерінің кітапханадағы күндерін Меркі ауданының кітапханашылары жалғастырды.
Меркі аудандық орталықтандырылған кітапханалар жүйесінің қызметкерлері әріптестерінің назарына «Кітап. Ел. Рух» атты «Рухани жаңғыру» бағдарламасы аясында әдеби монтаж, «Бір ел – бір кітап» республикалық акциясына арналған «Жыл таңдауы» тақырыбында ақпарат, Ш.Құдайбердіұлының шығармашылығы негізінде ұйымдастырылған «Жол табалық ақылмен» поэтикалық марафон, даңқты қолбасшы Б.Момышұлының батырлығы мен жазушылық ерлігіне арналған «Дархан даланың данышпан ұлы» библиоашар, өмір жасының тең жартысындай бөлігінде ауыр дертпен арпалыса жүріп, рух ерлігінің ерен үлгісін көрсеткен үлкен жүрек Н.Келімбетов туралы «Болашаққа үміт, жастарға сенім» әдеби қойылым, тақырыптық виртуалды кітап көрмесі мен «Бәріміз бірге ойланайық!» әдеби аукцион секілді бірнеше түрлі форматтағы іс-шаралардан құрылған «Рухани тарихымызды жоғары бағалаған ойшыл тұлға, қайсар қаламгерлер» атты іс-шаралар топтамасын ұсынды. Іс-шара соңы әуенді кешке ұласып, белсене қатысқан қонақтарға кітапхана директоры Э.Абдинованың атынан «Алғыс хат» табысталды. Іс-шараны облыс, қала кітапханаларының қызметкерлері офлайн, аудандық орталықтандырылған кітапханалар жүйелері онлайн жүйесінде тамашалап, пікір алмасты.
