«Нұр Отан» партиясының «Қазақстан кітапханалары – заманауи білім орталықтары» бастамашыл жобасы аясында Ш.Уәлиханов атындағы облыстық әмбебап ғылыми кітапханасындағы Бродкастинг залының ашылу салтанаты өтті.

   «Нұр Отан» партиясының облыстық филиалы төрағасының бірінші орынбасары М.Ж.Шукеев, облыс әкімінің орынбасары Е.Н.Манжуов, облыс әкімдігі мәдениет, архивтер және құжаттама басқармасының басшысы Д.Д.Бықыбаев, ақын, журналист, «Мирас» аймақтық кеңесінің мүшесі Қайырбек Асанов, ҚР еңбек сіңірген мәдениет қайраткері, «Зиялы заман» қоғамдық бірлестігінің төрағасы, «Мирас» аймақтық кеңесінің мүшесі Әлібек Әмзеұлы және т.б. іс-шараға қатысушылар кітапхананың екінші қабатында орналасқан Бродкастинг залының жұмысымен танысты.

   Кітапхана директоры Э.Абдинова қонақтарды негізгі конференцзал және жайлы жұмсақ жиһазбен жабдықталған қонақжай (жайлы аймақ) қызметі туралы айта келе,  аталмыш залда офлайн-онлайн форматында түрлі семинарлар, іскерлік кездесулер, еркін пікір алмасу, шеберлік сыныптар сияқты іс-шаралар өткізу жағдай жасалынып, кеңестік қызметтер түрлерін ұсыну (сұраныс түскен заңгерлер, қаржы мәселелері және басқа да сала мамандарын) арқылы мамандардың тегін кеңес берулерін ұйымдастыруға мүмкіндік беретінін жеткізді.

   Әрі қарай қонақтар кітапхананың бірінші қабатында орналасқан цифрландырылған ақпараттық орталықтың жұмысымен де таныстырылды.

   Цифрландыру жұмыстарын тиісті деңгейде жүргізу үшін 10 компьютер, тыңдағыштармен жабдықталған 6 моноблок, көшірме (Ксерокс Toshiba e-STUDIO, Ризограф) техника, құжаттарды цифрландыруға арналған түрлі А3 мен А4 форматтағы сканерлер, планетарлы сканер ЭларПланСкан-В және т.б. техникамен жабдықталған орталықтың жұмысына да қонақтар өз ризашылығын білдіріп, сәттілік тіледі.