Жуырда Жамбыл облысы әкімдігінің мәдениет, архивтер және құжаттама басқармасы Ш.Уәлиханов атындағы Жамбыл облыстық әмбебап ғылыми кітапханасының ұйымдастыруымен аудандық кітапханада облыстық тәжірибелік семинар өтті. «Инновациялық жобалар – кітапхана тартымдылығының жаңа пішіні» тақырыбында өткен семинарды аудан әкімінің орынбасары Қ. Садубаев ашып, семинардың жұмысына сәттілік тіледі. Облыстық семинарға облыстық, қалалық, аудандық кітапханалар директорлары, әдістемелік және қызмет көрсету бөлімдерінің меңгерушілері, балалар мен жасөспірімдерге қызмет көрсететін бөлім қызметкерлерімен қатар Жамбыл облысы әкімдігінің мәдениет, архивтер және құжаттама басқармасы басшысының орынбасары Зүбайра Сембина, Ш.Уәлиханов атындағы облыстық әмбебап ғылыми кітапханасының директоры Эльмира Абдинова және Астана қаласынан семинарға арнайы келген ҚР Ұлттық академиялық кітапханасының Ғылым, менеджмент және маркетинг қызметінің жетекшісі Сәулеш Назырова қатысты. Семинар жұмысының алғашқы бөлімінде «Цифрлік ортадағы кітапхана қызметінің бағыттары», «Кітапхана имиджін қалыптастыру стратегиясы» сынды тақырыптарда баяндамалар оқылып, кітапхана қызметіне инновацияларды енгізу, мамандардың кітапханалық-ақпараттық білімін кеңейту сияқты мәселелер талқыланды.
Бір күнге созылған семинар барысында сайыс түрінде өткен «Кітапханалық дебют» атты жас кітапханашылардың авторлық жобалар жәрмеңкесінде Сарысу аудандық орталықтандырылған кітапханалар жүйесінің жас кітапханашысы бас бәйгені қанжығасына байлады. Семинардың келесі бөлімі Талас аудандық кітапханасының әдістемелік библиографиялық бөлімінің меңгерушісі А.Мұратбекованың ұйымдастыруымен «Қасиетті қазыналы даласың, Батырлар мен ақынға бай Таласым» атты әдеби-сазды, концерттік бағдарламасымен жалғасты. Туған өлкенің кешегісі мен бүгіні, ертеңі жайында сыр шерткен кеште ақын Нарша Қашағанұлының, Үміт Битенованың өлеңдері оқылды. Өмірден ерте озған арда ақын Серік Томановтың «Соғыс туралы балладасынан» үзінді сахналанды.
Мадина Жарас,
Талас тынысы. – 2017. – 3 қазан (№97). – 2 б.