«Нұр Отан» партиясының құрылған күніне орай, партия облыстық филиалының ғимаратында салтанатты жиын өтті. Басқосуда оң өзгерістерге толы 19 жылдағы саяси үйымның қол жеткізген жетістіктері сараланып, шыққан биігі мен алдағы жоспарлары сөз болды.
- Тұңғыш Президентіміз, партия Көшбасшысы Нұрсұлтан Назарбаев біздің бағыт-бағдарымызды нақтылап берді. Алғаш кұрылған кезден бастап-ақ партия халыққа жақын болу ұстанымынан айныған емес. Соның нәтижесінде тұрғындардың әлеуетін көтеруге атсалысты, әлеуметтік мәселелердің туындау себебін зерделей жүріп, мемлекеттік бағдарламалардың ашық түрде жүзеге асырылуын бақылауда ұстады. Жұрттың сеніміне ие болған құрылым еліміздегі бейбіт те берекелі өмірдің орнауына өз үлесін қоса білді, - деді облыстық филиал төрағасының орынбасары Шәбден Тілеумұрат салтанатты шарада.
Мәліметке сүйенсек, қазіргі таңда өңірде партияның 12 филиалы жұмыс істейді. Ондағы 337 бастауыш партия ұйымының 70 мыңға жуық мүшесі бар. Көпшілікті партия қатарына тартуда сан қумай, үміткердің қоғамдағы беделі мен тәлім-өнегесіне мән берілуде. Айталық, өткен жылы партия қатарына қабылданған 6598 адамның 1854-і шағын және орта бизнес өкілдері болса, экономика және қызмет көрсету саласы бойынша 2728 азамат партия қатарына қабылданған. Барлық бастауыш партия ұйымдары 100 пайыз бөлмелермен, компьютерлермен және арнайы стендтермен қамтамасыз етілген. Былтыр Талас ауданынын «Аққұм», Жуалы ауданының «Орталық» бастауыш партия ұйымдарының «Үздік бастауыш партия ұйымы» республикалық байқауында жеңімпаз атануы- нақты жұмыстардың жемісі.
Салтанатты шарада ұйым ардагерлері Қайрат Шотбаков, Еркінбек Солтыбаев сөз сөйлеп, партияның облыстық филиалы атқарып жатқан жұмыстарды сөз етті. Сондай-ақ газетінің директор-бас редакторы Қуат Әуесбай, спортшы Дархан Сәрсенов, «КТК» телеарнасының облыстағы меншікті тілшісі Руслан Әбдіманап, жас ақын Төлеген Сағадинов пен белсенді жасотандық Айғаным Амангелдіге партия билеттері салтанатты түрде табысталды. Партия жұмысына белсене атсалысып, мақсаттары мен міндеттерін орындауға үлес қосып жүрген облыстық онкологиялық диспансердің бас дәрігері, «Қамқор» бастауыш партия ұйымының төрағасы Абай Нұржанов, Ш.Уәлиханов атындағы облыстық әмбебап ғылыми кітапханасының директоры, «Ұлан» бастауыш партия ұйымының төрайымы Эльмира Абдинова партия облыстық филиалының Құрмет грамотасымен марапатталды.
Жанғазы Ахмет
Ақ жол. - 2018. - 3 наурыз (№26). – 2 б.